Facebookip sinneqartoorutini pingasoriaatinngortikkai
Facebookimillu atuisut amerliartuinnartut kisitsisit aamma takutippaat. Franskit nutaarsiassaqartitsiviat AFP taama allaaserisaqarpoq.
Aningaasat Facebookip ukioq manna qaammatini siullerni kaaviiaartitai 5,38 milliardit dollariupput, imaluunniit 35,4 milliardit koruunit missaat, siorna piffissap taamaalinerani 3,54 milliardit dollariusut, tassa 23,3 milliardit koruunit missaat. Allatulluunniit oqaatigalugu: Aningaasat kaaviiaartitat 56 procentinik amerleriarsimapput.
- Ukioq manna aallartilluarpoq, Facebookimik aallarneeqataasoq, pisortaanerlu Mark Zuckerberg oqarpoq.
Oqarasuaatit angallattakkat aqqutigalugit Facebookimik atuinerup annertusiartuinnarnera ilaatigut pissutaalluni Facebookip kaaviiaartitai sinneqartoorutaalu amerliartorput.
Inuit 30.000-it missaat Facebookikkut Nunatsinni attaveqartut ilimagineqarpoq. Suliffeqarfik siunnersuisoqarfik Kompetencekompagniet taama naliliivoq.
