Facebookimi paasissutissaatitit pisortat atorsinnaavaat
Facebookimi atuisut pillugit paasissutissat inunnit taama amerlatigisunit atuarneqarsinnaappata, takkua pisortanit atorneqarsinnaasut, folketingep ombudsmandiata aalajangiinerani tunngaviuvoq.
Folketingep ombudsmandianut suliassanngortitsinermi, aallaavigineqarpoq arnap Facebookimik atuisup paasissutissaatai, akileraartarnermut sulisup suliaminut atatillugit atorsimammagit.
Taanna isumaqarpoq imminut tunngassuteqartut innimiillisaarfigineqartut, ulluinnarnilu inuuneranut susassarinngisaminnut akuliuttut oqarluni.
Arnaq taanna pillugu paasissutissat arlaqartut Facebookimi atuarneqarsinnaapput, allassimasullu taakkua Facebookimik atuisunit tamanit atuarneqarsinnaallutik. Arnaq taanna pillugu paasissutissat Facebookimi ikinngutaasa kisimik atuarsinnaasariaqanngilaat.
- Facebookimi paasissutissat inummut tunngasut taama ammatigisumik saqqummiunneqarpata, paasisutissat taakku pisortatigoortumik saqqummiunneqartutut naatsorsuutigineqassapput, Hans Gammeltoft Hansen Folketingep ombudsmandia oqarpoq.
Arnap Facebookimi paasissutissaatai akileraartarnermut sulisup ajornartorsiutiginagu atorsinnaavai, tassami paasissutissat ilumoortuummata.
- Arnaq matoqqasumik attaveqaqatigiittarfeqarsimagaluarpat, akileraartarnermillu suliaqartoq allaasuusaarluni paasissutissanik pissarsiniarsimagaluarpat, pissutsit allaasimassagaluarput. Tamanna inatsisinik unioqqutitsinerusimassagaluarpoq, Hans Gammeltoft Hansen oqarpoq.