Facebookimi gruppi: Greenpeacep ataatsimiisitsinissaanut peqataanasi

Greenpeacep uuliasiorluni Qeqertarsuup avataani misiliilluni qillerinerit pillugit unnugu nalunaaqutaq arfineq marlunut oqallitsitsinissaa pisoqarfiungaatsiassagunarpoq.
Allattoq Elisa Isaksen
aggustip 19-at 2010 08:43

Inuit arlallit nittartakkami Facebookimi eqimattat Nuummiunik kajumissaaripput, unnugu ataatsimiititsinissamut peqataaqqunagit, taarsiulluguli unnugu arfineq-marlunngulerpat Katuap silataanut takkuteqqullugit.

- Katuap silataanut takkunnissigut Greenpeacep Nunatsinnut akerliuniarluni iliuuseqarneranik akuersinnginnersi takutissiuk. Ataatsimiititsinermut inuit takkunnatik Katuap silataanut takkuteqqullugit kajumissaarpavut. Ataatsimiititsinermut inuppassuit takkuppata, tamanna Greenpeacep ajugaanermisut nunani tamalaani tusagassiorfinnut tusaqqusaarutigisinnaavaa, Pilu Kasper Bech Facebookimi eqimattaneersoq allappoq.

Greenpeacep sunniiniarnerata kingunerisinnaasai, Facebookimi eqimattat ernumanartoqartippaat, matumanilu Greenpeacep 70-ikkut qiteqqunneranni puisinniarnermut akerlilersuilluni sunniiniarnera innersuussutigalugu.

- Greenpeacep Nunarput pillugu sallumik siaruartereqqilernera, isumaqarpunga kalaallit amerlanerit qatsukkaat. Greenpeace isumaqarpoq Kalaallit Nunaata nunarsuarmiunut taamatut saqqummiunnissaa ajornanngitsunnguusoq. Tassami Nuna inukitsoq uuliamik mingutsitsisuninngaanniit saassutarissallugu ajornannginnerusimagunarpoq, Pilu Kasper Bech KNR-imut qarasaasiakkut taama allappoq.

Facebookimi eqimattaq 'Grønlændere imod Greenpeace' ippassaq pilersinneqarpoq, ullaap tungaanilu 90-inik tapersersorteqalersimalluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq