Facebook, Twitter Vimeolu nunatsinnukarusulersitsissapput
Atuagassiami angalanernik sammisaqartumi Take Off-imi taama allaaserinnittoqarpoq.
Inuit amerlasuut Nunarput ungasissorujussuartut avammullu matoqqasutut, takornariarfigineqarpiarnerlu ajortutut isigeqqajaasarpaat - qallunaat matumani pineqanngillat, taakkumi Nunatsinnukartartuni amerlanersaapput.
Maannali ilaatigut videuliat arfinillit Facebookimi, Twitterimi aamma Vimeo-mi takutinnerisigut pissutsit piviusut oqaluttuarineqassapput.
Taakkunani ilaatigut takutinneqassallutik Nunatsinni takornariat ilungersunartunik misigisassarsiorsinnaasut, soorlu qulimiguulimmik qaqqanukaanneqariarluni sisorartoqarsinnaasoq imaluunniit snowboardertoqarsinnaasoq.
Videoliat Nunatta avannaani filmiliarineqartut nittartakkami uani takuneqarsinnaapput:
arcticcircle.gl/roughrealremote.
Tamatumunnga peqatigitillugu videuliat Nunatsinni pinngortitamik takutitsisuupput, ilaatigut arsarnerit takutinneqarlutik, soorlu aamma qimussertoqarpoq, qamuteralannik ingerlaartoqarluni kiisalu kalaallit oqaluttuarisaanerat oqaluttuarineqarluni.
Takornarianik pilerisaarinermi internetikkut attaveqaatit siullerpaajugunartumik Nunatsinnit atorneqarput.