Facebookip Australiami nutaarsiassanik siammarterinermik inerteqquteqarnissani sioorasaarutigigaa
Amerikamiut nittartagaat nunarsuarmi tamarmi atorneqartartoq, Facebook, nutaarsiassanik siammarterinermik Australiami facebookimik atuisunut tusagassiuutinullu mattussinissaminik sioorasaarivoq. Australiami naalakkersuisut, Facebookip Googlellu Australiami tusagassianut akiliisalernissaannik inatsisissatut siunnersuuteqarmata taamaaliorpoq.
- Australiami nutaarsiassanik tusagassiunermillu suliaqartunut siunissaq ungasinnerusoq eqqarsaatigalugu iluaqutaasussaanngimmat taakkua illersorniarlugit taamaaliorpugut, Facebookip Australiami New Zealandimilu pisortaa Will Easton marlunngornermi allappoq.
- Inatsisissatut siunnersuut akuerineqassappat, Australiami saqqummersitsisartut inuinnaallu nutaarsiassanik australiameersunit nunanillu tamaneersunik Facebookimi Instagrammimilu pinaaserluta siammarterisinnaajunnaarsittariaqassavagut, Will Easton allappoq.
AAMMA ATUARUK Facebookip nakkutilliinerusoqalernissaa siunnersuutigigaa
Australiami naalakkersuisut sioorasaarutinit suminngaaneeraluartunilluunniit sunnertinnavianngitsut, Australiap aningaasaqarnermut ministeria Josh Frydenberg akissummini erseqqissaavoq.
- Australiami soqutigisavut tunngavigalugit inatsisiliortarpugut, taanna oqarpoq.
Inatsissatut siunnersuut atuutilissappat tamanna Australiami tusagassiuinermik suliaqartunut aningaasatigut ajornartorsioreersunut iluaqutaassasoq, aningasaqarnermut ministerip ilanngullugu nalunaarutigaa.
Nunarsuarmi suliffeqarfiit pisuujunerpaat pissaaneqarpaallu Google Facebookilu Inatsisissatut siunnersuummi siullermik pineqarput, nittartakkalli allat kingorna ilanngunneqarsinnaallutik.
Australiami naalakkersuisut inatsisissatut siunnersuutaat ukiup ingerlanerani aalajangiiffigineqartussaq Australiami tusagassiorfinnit taperserneqarpoq.