Facebookip nakkutilliinerusoqalernissaa siunnersuutigigaa
![](/sites/default/files/styles/image_934x467/public/article_images/20200217-193013-l-1920x1350we.jpg?itok=GtJjQfOR)
Nittartakkakkut attaveqaqatigiittarfitsigut uumisuttumik imalinnik siammarterisarnerit eqqunngitsumillu paasissutissiisarnerit nakkutigineqartalernissaat pisariaqalerataannaavoq.
Nittartakkakkut attaveqaqatigiittarfissuaq Facebook taama siunnersuuteqarpoq.
Facebookimik pilersitsisup, Mark Zuckerbergip EU-mi qullersat ataasinngornermi ataatsimeeqatigimmagit nittartakkatigut attaveqaqatigiittarfiit Facebookitut ittut pitsaanerusumik qanoq nakkutigineqarsinnaanerinik oqalliseqatigai.
Facebookimik pilersitsisoq ataatsimiititaliap digitalikkut pisut paasissutisseeriaatsillu Europami pilersaarusiorneqarnissaat pillugu pingasunngornermi saqqummiussinissaanut ullut marluk sioqqullugit pulaarpoq.
Vestager digitalitigut periusissianik saqqummiisoq
Zuckerbergip ilaatigut Margrethe Vestager ataatsimiinnermi naapippaa, taanna ataatsimiititaliami siulittaasumut tullersortaallunilu EU-mi unammilleqatigiinnermut kommisæriuvoq.
Margrethe Vestagerip kommissærit allat peqatigalugit digitalitigut akisussaaffiit pingasut saqqummiuttussaavai.
Nutaarsiassaqartitsivik Reuters naapertorlugu pilersaarutit ilaatigut amerikamiut qarasaasianik suliffeqarfissuisa qalliuniartarnerat allanngortinneqarusuppoq. Assersuutigalugu Facebook, Google Amazonilu amerikamiut qarasaasiaqarfissuani atugaanerpaapput.