Facebook aappassarsiorfigisalerpaat
Siornaatsiaannaq Nunatsinni kisermaat aappassarsiortut internetimi naapittarfianni dating.gl-mi ilaasortat 500-ut missaanniisimapput. Maanna 83-iinanngorput, tamannalu internetimi naapittarfiit allat unammillernerannik pissuteqarpoq.
- Naapittarfik pilersippara Facebook pilersinneqanngikkallarmat, maannali internetimi naapittarfiit allat Nunatsinnut takkummata dating.gl soqutigineerussimavoq, Ove Gram dating.gl-mik pilersitsivoq KNR-imut oqarpoq.
Naapittarfik facebookimit qaangerneqaraluartoq nikalluallaatiginagu ingerlaqqinniarsarivoq. Maanna naapittarfimmik atuineq akeqarunnaarsippaa siornatigut tassani inooqatissarsiorneq qaammammut 60 koruuninik akeqarsimagaluartoq.
Oqaluttuatsialaat peerussimapput
Naapittarfik sivitsortumik programitigut ajutoorneq pissutigalugu matoqqasimasoq ammaqqippoq. Oqaluttuatsialannulli linki imaqanngilaq. Iluatsittumik aappassarsiortut oqaluttuaat tassaniissimagaluarput. Soorlu:
”Arnaq ujagara nassaarivara. Maannakkumut qujavunga.”
”Uissara nassaarivara!”
”Nassaarivara;o)”
”Nerrivimmi siniffimmilu avitseqatissara nassaaraara J, sullilluarneqarsimanermut qujavunga.”
Kisermaat naapittarfiat dating.gl Danmarkimiit aqunneqarpoq Nunatsinni internetimik atuinermut aningaasartuutit qaffasippallaarmata.
