Suiaqatiminoortartut siulliit Savalimmiuni katipput

Savalimmiormiut oqaluttuarisaaneranni pingaarutilimmik ullumi pisoqarpoq, aappariit suiaaqatigiit siulliit ullumi katimmata. Savalimmiuni aviisit ilaat Sosialurin taama allaaserisaqarpoq.

Suiaqatiminoortartut Savalimmiuni katissinnaanissaannut inatsit ukioq manna juulip aallaqqaataani atuutilerpoq, suiaqatiminoortartulli siulliit maanna aatsaat katillutik.

Katittulli Savalimmiuneersuunngillat, aappariimmi katittut Tuluit Nunaanneersuullunilu Irland Avannarlermeersuummata.

Tuluit Nunaanni katissimasinnaagaluarput, suiaqatiminoortartut Irland Avannarlermi suli katissinnaanngimmata.

Savalimmiunilli nuannaartorisaqarnertik pillugu, Savalimmiunilu suiaaqatigiit katissinnaalernissaannut oqallinnermut malinnaasimallutik. Savalimmiunilu katinnissartik taamaammat aalajangerpaat. Sosialurin taama allaaserisaqarpoq.