Suliffissarsiorlutik itigartartut ikiligaluttuinnartut
Ukioq manna maajimi ukiumut kingullermut maajip qaammataanut naleqqiullugu suliffissarsiortut 548-nik ikinnerusut naatsorsueqqissaartarfimmi kisitsisit takutippaat.
Allattoq Kenneth Elkjær
Nutserisoq Aili Liimakka Laue
Maajimi nunatsinni suliffissarsiortut 2508-put, siorna suliffeqanngitsut 3056-ullutik.
Illoqarfinni amerlanerni suliffissaaleqineq annikilliartorpoq. Nanortalimmili, Ittoqqortoormiini, Qaanaami, Sisimiuni, Kangaatsiami Aasiannilu suliffissaaleqisut amerleriarsimapput.
Qeqertarsuarmi, Uummannami Qasigiannguanilu ukioq manna maaji 2017-mut naleqqiullugu suliffissaaleqineq marloriaataanik sinnerlugu appariarsimavoq.
Kisitsisini nutaani takkuttuni takuneqarsinnaavoq, suliffissaaleqisuni angutit arnaniit amerlanerusut, suliffissaaleqisullu amerlanerpaat 328-it 20-t 24-llu akornanni ukioqartut.