Atuarfeqarfiit nalilersorneqarnissaannut ilinniartitsisut akissutaat ikippallaartut
Apeqqutinik akisassianik suliarinnittuuvoq Helene Brochmann Danmarkimi Naliliisarfik Danmarks Evalueringsinstitutimeersoq.
Meeqqat atuarfiat ineriartorteqqissagutsigu pisariaqarluinnarpoq meeqqat atuarfiini meeqqatta ineriartornerinik ilikkariartornerinillu suliaqartut tamarmik nalilersuinermut peqataanissaat, taama tusagassiorfinnut nalunaaruteqarpoq linniartitaanermut, Kultureqarnermut, Ilageeqarnermut Ilisimatusarnermullu Naalakkersuisoqarfik, kommunit kattuffiat KANUKOKA aamma Ilinniartitsisut meeqqat atuarfianeersut Kattuffiat IMAK, siorna septembarip ulluisa 18-ianni.
Taama oqariartuuteqarneq tamanit tusarneqarsimagunanngilaq.
Naak suliniuteqarluartoqaraluartoq ilinniartitsisut sisamararterutaat taamaallaat apeqqutinik akissuteqarput, nalilersuinissamut misissuinermut atatillugu nassiunneqarsimasunit, nalileeqqinnissamut suleqatigiiffiup Danmarks Evalueringsinstitutimi siunnersorti Helene Brochmann nunatsinni meeqqat atuarfiisa nalilersuiffigineqarnerannut aqutsisoq oqarpoq.
Apeqqutinik nassitsiffigineqartut tamarmik akissuteqarnissaannut iliuuseqarsimanerput kisiat oqaatigisinnaavara, Helene Brochmann oqarpoq.
Nalileeqqinnissamut suleqatigiinnit apeqqutit kalaallisut qallunaatullu allassimasut mailikkut nassiunneqarput, maileqanngitsullu nittartakkamut atuagassanngorlugit allanneqarlutik taakkua saniatigut misissuisitsineq aviisimi Sermitsiami sammineqarpoq kiisalu atuarfiit pisortaasa kaammattuuteqarnerisigut sulisut sinniisui allaffigineqarput ilaasortat akissuteqarnissaannik kaammattorneqarlutik.
- Uggornarpoq ilinniartitsisut 75 procentii isumaqarmata suliami ingerlanneqartumi akuunissartik pisariaqartinngimmassuk, Helene Brochmann oqarpoq.
Ilinniartitsisut 25 procentii akissuteqarsimagaluartut nunatsinni ilinniartitsisut amerlassusaannut akissutigineqartut atorneqarsinnaalluarput.
Akissuteqartut ikippallaarnerat pissutigalugu akissutigineqartut aallaavigalugit inerniliinissaq nalorninartoqarpoq.
- Nalorninartut arlaqarput, taamaattumik inerniliinissat mianersuunneqartariaqarput aperineqartummi 75 procentii imaassinnaavoq allarluinnarmik isumaqartut - apeqqutinik akisassianik misissuisitsinermi akissuteqarsimasunit, Helene Brochman oqarpoq.
