EU-mi qullersap Ruslandip pissusilersuutai Goebbelsip pissusilersuutaanut assersuukkai

Ruslandip inuit tuusintilikkaat assilissanik videolianillu eqqunngitsunik amerlasoorpassuarnik pilersitsiortortippai, soorlu aamma paasissutissanik eqqunngitsunik amerlasuunik aamma siammaatitsisoq.

EU-p nunanut allanut tunngasunut qullersaa Josep Borrell taama oqarpoq. Taassuma Bruxellesimi marlunngornermi ataatsimeersuartoqarnerani pasilliutit ilungersunartut taakku saqqummiuppai.

Ruslandip Ukrainep kangisissuani sakkutuuleeqqileruttornerani Borrell oqalugiarpoq, Ruslandillu Ukrainemi sorsunneq taamaasilluni nangeqqinniaraa oqaatigalugu.

AAMMA ATUARUK Tusagassiortoq russeq ukiuni arfineq-pingasuni parnaarussassanngortitaasoq

Ruslandilu sorsuttoqarneranut akerliusoqarnera annikillisarniarlugu paasissutissanik eqqunngitsunik amerlasuunik siammarteriniarsarisoq, Borrellip ilanngullgu aamma oqaatigaa.

Paasissutissat eqqunngitsut Ruslandimeersut 15.000-t, EU-p nunanut allanut tunngasunut qullersaqarfiata 2015-imili katersorsimagai Josep Borrellip oqaatigaa.

Ruslandillumi pissusilersuutai, nazistip Joseph Goebbelsip pissusilersuutaanut Josep Borrellip allaat assersuuppai. Goebbels Tysklandimi 1933-mit 1945-p tungaanut propagandaministeriuvoq, Tysklandip pissusilersuutai pillugit eqqunngitsunik siammarterisoqarneranut akisussaasuulluni.

Paasissutissanik eqqunngitsunik siammarterisoqartarneranut akiuiniarnerup sakkortusarneqarnissaa EU-p sulissutigisariaqaraa Borrellip kissaatigaa.