Europap avannaani silarluttorsuuvoq

Europap avannaani ullumi anorersuarpoq.

Tamanna sorpassuarnik kinguneqarpoq.

Tysklandip avannaani anorersuarnissaanik aarlerisaaruteqarmat innuttaasut ippassaq piareersarput, Europallu avannaani ulussaarsuarmat sorpassuit aseruatiterput. Tysklandimi politiit qatserisartullu ulappupput. Hamburgip umiarsualiviani qarsutsinissaq aarleqqutigineqarmat, umiarsuit aallaqqusaajunnaarput.

Finlandimi aamma nittaalartalimmik anorersuarpoq, taamaalimmallu qimuttuitsut Finlandip kujasinnerusortaani ingerlaqqissinnaajunnaarput. Sverigep avannaani nittaalarujussuarmat, orpiillu uppigarsimasut qimuttuitsut aqqutaat matusimammatigik, qimuttuitsunut ilaasut 100-likkuutaat aamma ingerlaqqissinnaajunnaaqqapput.

Sverigemi innaallagissap aqqutai kittorarmata angerlarsimaffiit ikinnerpaamik 46.000-t innaallagiaarupput. Nordsømi ulussaarsuartut sakkortutigisumik anorlertoq, Norgemi annaassiniartartut qullersaqarfiannit nalunaarutigineqarpoq. Nordsømi uuliasiorfik immap naqqanut atanilik, 75-inillu sulisulik, attavimminit unnuaq kaanngarpoq saavilerlunilu. Savalimmiormiut umiarsuaat Stavangerip kujataani ajunaalerluni nalunaaruteqarpoq. Umiarsuaq nammineq nunaliarsinnaasimavoq, malissiornerminili atortorissaarutai arlalllit aseruatiterlutik.

Sverigemiut uuliamik assartuutaat Østersømi kinngussangatinneqarpoq. Qulimiguullit annaassiniarnermi atorneqartartut umiarsuarmi inuttanik aallersimagaluarput, anorlerpallaaqimmalli inuttaasut ikineqarsinnaasimanngillat. Umiarsuit arlallit umiarsuup tungaanukartut nalunaarutigineqarpoq.

Sverigemiut uuliamik assartuutaat 14-inik inuttalik qanittukkut kivivoq, tassani inuttat aqqaneq-marluk qulimiguulimmit annaanneqartut Ritzaumit nalunaarutigineqarpoq.