Europamiut pinerliisoqarnissaanut naalaaserloqqilerput
Europami pinerliisoqaratarsinnaanera ernumagineqarnerulerpoq pingaartumillu pisortat ernumanerulerlutik.
Tyskip sakkortusaarniartartup Amerikamiunit aasap ilaani tisusarineqartup killisiorneqarnermini Al-Qaeda Europap illoqaerfiini arlalinni pinerliiniarniarluni pilersaaruteqartoq oqaluttuaraa taamaammallu Europami USA-milu oqartussaasut ernumalerput. 2008-migooq Mumbai-imi Indiamiittumi saassussinerup assinganik saassussisoqarumaartoq oqaluttuarisimavaa.
Tamannalu tassa pillugu Tuluit Amerikamiullu innuttaminnik Tysklandimi Frankrigimiluunniit angalaniartunik mianersoqqusipput.
- Pinerliisoqarataannaaneranut mianersornissamut pissutissaqartoq pisup takutippaa, Tuluit Nunaanni nunanut allanut ministeri William Haig oqarpoq.
Amerikamiut angalanissamut ilitsersuutaanni Europamut angalaqqusiunnaartoqanngilaq, mianersorneroqqusinerli immikkut illuinnartumik periarneruvoq.
Angalanissamulli ilitsersuut isorineqarpoq. - Ingasattajaarneruvoq, ilami sumi qaqugulu saassussisoqarsinnaanera eqqaaneqanngimmalluunniit ippinnarpoq, FBI-mi pisortaasimasoq CNN-imut oqarpoq allanillumi aamma ilalerneqarluni.
Sverigemiup pinerliiniarnermik ilisimasallip, Magnus Ranstorp-ip mianersoqqusineq ilumooruteqquaa. USA-migooq taamatut mianersoqqusippat taava ilumoortortaqarsimassooq, Ranstorp oqarpoq.
Mianersoqqusineq tunngavigalugu Danmarkimi saassussisoqarsinnaanera pillugu qallunaat mianersornerulinngillat aammalu Nunanut Allanut Ministereqarfiup angalanissamut ilitsersuutaani ilanngunneqarnani.
