Europami nunat aningaasaliiniarnerminni paamaarput
Taamaattorli Europami nunat ilisimatusartussanut aningaasaliiniarnertik ima paamaarutsigaat ilisimatusarneq 2007-imi naatsorsuutigisamit annikinnerusumik ingerlanneqarluni.
Ilisimatusarnermi ataqatigiissaarisoq Henning Thing Issittuni pissutsinik ilisimatusarfimmeersoq ima oqarpoq:
- Ukiormanna Amerikamiut ilisimatusartut amerlanerupput, Europamiut ilisimatusartut naatsorsuutigisaraluatsinniit ikinnerupput. Tamatumunnga patsisaavoq, Europami nunat amerlasuut ilisimatusarnermut immikkut aningaasaliissutissatik suli akuersissutigisimanngimmatigik, ilisimatusartussallu nunatsinni misissuiartornissamut piareersarnissamut naammattumik periarfissaqarsimanatik. Ilisimatusariartortut amerlanerusut 2008-mi 2009-milu takkussuunnissaat naatsorsuutigaarput, Henning Thing oqarpoq.
Henning Thingip erseqqissarpaa Europami nunat tamarmik issittumut aningaasaliinissamik paamaarussinngimmata. Amerlasuulli misissuiartorniaraanni ukiut marluk sioqqullugit piareersarnissaq eqqummaariffigineq ajorpaat.
- Nunat ataasiakkaat aningaasanut inatsisissatik siusissukkut akuersissutigisarmatigik eqqumaffiginiarneqarsimanngilaq. Piareersarneq annerusumik 2006-imi ingerlanneqarpoq, ilisimatusariartussalli ukiut marluk sioqqutsisumik piareersarfissaqarnissaat nalinginnaasarpoq. 2007-imi annerusumik ilisimatusartoqannginnera uggorineqarsinnaavoq, taamaattorli 2008-mi 2009-milu annerusumik ingerlatsisoqarnissaa neriuutigaarput. Taamaattorli Issittup Ukiui suli aallartinngitsutut oqaatigineqarsinnaanngillat, tassami ilisimatusarnernik arlalissuarnik ingerlatsisoqalereerpoq. Kisianni aningaasaliinissamut tunngasut siusinnerusukkut aaqqinneqarsimagaluarpata amerlanerusunik ukiormanna ilisimatusarnernik ingerlatsisoqarsinnaagaluarpoq, Henning Thing naggasiivoq.
Danmarkimi 2007-imut aningaasanut inatsimmi 39 million koruunit Issittup Ukiuinut ilisimatusarnissamut atugassanngortinneqarput. Tamatuma saniatigut Danmarkimi naalakkersuisut aamma Dansk Folkepartip 60 million koruunit akuersissutigaat, aammattaaq 400 million koruunit Nunatsinni ilisimatusarnissamut atugassanngortinneqarput. Taamaattorli aningaasat ilisimatusartunut suli tunniunneqanngillat.
Issittup Ukiui 2007-imi marsip aallaqqaataaniit 2009-mi marsip aallaqqaataata tungaanut ingerlanneqartussaapput.
