Europami anorersuarnera assammik arsartartut aamma misigaat
Europami anorersuarnera kalaallit assammik arsartartut aamma misigaat.
Unammisartuutivut sapaatip akunnera kingulleq Frankrigimeereerlutik Tysklandimi Wetzlarimut bussinut ilaallutik ullumi tikipput. Anorrsualeruttortoq nalunaaquttap akunnerini arfinilinni bussersimapput. Aqqutaani niusariaqarsimapput, biili anorersuarmit uppisinneqarsimasoq aqquinermi maaniinnarmiittoq illuartikkiartortariaqaramikku. Tysklandiliartut arlalissuit GHF-illu siulersuisuinut ilaasortat Hannoverimiit ingerlaqqinnaveeqagallarput, qimuttuitsut atugassaasa anorikillinissaa utaqqimmassuk.
Assammik arsartartut Wetzlarimut tikikkamik tusagassiorfinnit qanoq alapernaanneqartiginertik malugaat, tassami nunarsuaq tamakkerlugu pissartanngorniunnissamut peqataasussat taamaanneqartarmata. Unammisartuvut TV-liortunit, aviisiliortunit isiginnaartartunillu nuannarinnittorpassuarnit naapigiarneqarput.
Kingullertigut ajoqusersimanerit aaqqereersimapput, taamaalillutik nunatsinneersut tamarmik unamminissamut piareersimapput. Unamminissaat siulleq aqagu pissaaq, Kalaallit Nunaat Sloveniamut nalunaaqutaq marlunut unammissammat, tassa uagut nalunaaqutarput malillugu. Unammineq KNR-TV-kkut toqqaannartumik aallakaatinneqassaaq.
Arsaattarfimmi ulikkaavissimasumi unammissapput, 5.000-nik isiginnaartoqarlutik. Gruppe A-mi unammisussaat aappaat tassaapput Tunesia Kuwaitilu.
