Europami aalisapilunneq
Piffissap ingerlanerani nunatsinni apeqqusiisoqartaannarpoq aalisakkat raajallu pisarineqarsimasut eqqortumik nalunaarsorneqartarnersut imaluunniit unioqqutitsisoqartarnersoq
Tamannattaaq nunani allani soorlu Europami ajornartorsiutaasarpoq. EU kommissionip saqqummiuteqqammerpaa Østersøenimi saarullinnik aalisapiluttoqartarnera, ilaatigut Danmarki, Sverige kiisalu Polen pisassinneqaqqaaratik aalisartarsimapput naak saarulliit nungukkiartornerat aarleqqutigineqaraluaqisoq. Oqaatigineqarporlu Polenimiut saarullinnik pisaasa affaat unioqqutitsilluni pisarineqarsimasut.
EU kommisioni 2005-imi 6-imilu piniapiluttoqarneranik misissuisitsivoq.
”Saarullinnik piniapiluttoqartarneranik kisitsisit aarlerilersitsipput, tamannalu tassa immikkut ilisimasallit ukiorpassuarni aarleqqutigisartagaat, tamannalu piaartumik iliuuseqarfigineqassaaq,” EU-p aalisarnermut tunngatillugu oqaaseqartartua Mireille Thom oqarsimavoq.
Aalisapiluttoqarnera erseqqissumik uppernarsarneqaraangat EU kommissioni nunanut ilaasortaminut pillaasarpoq.
Soorlu Frankrig unioqqutitsiuartarmat siusinnerusukkut 600 mio. koruuninik akiliisinneqarpoq taamatuttaaq Tuluit Nunaata Irlandillu 2001-imiit 2005-imut aalisakkanik makrelinik pisassaat ikilisinneqarujussuarput.
