EU-p uuliamik suli akuiagaanngitsumik Ruslandimit eqqussuinini unitsinniaraa

EU-p uuliamik suli akuiagaanngitsumik Ruslandimit eqqussuinini qaammatit arfinillit ingerlaneranni unitsinniarpaa, uuliallu sukuluiakkat assigiingitsut ukioq naatinnagu atorunnaariartorneqalersimassallutik.

Tassa EU-Kommissionip Ruslandimut pillaatitut iliuuserisaasa arfinilissaanni ilaatigut siunnersuutaa.

EU-Kommissionip siulittaasua Ursula von der Leyen, EU-Parlamentimut Strasbourgimi ullumi pingasunngornermi oqalugiarnermini taama oqarpoq. EU-p siunissaa tutsuiginassusialu Ukrainemi sorsunnermut qisuariarnernit sunnerneqartoq taassuma ilaatigut oqaatigaa.

- Putinip peqqarniitsumik saassussinera kinguneqartariaqarpoq. EU-p siunissaa Ukrainemi pisunit aamma sunnerneqarpoq, Ursula von der Leyen oqarpoq.

AAMMA ATUARUK Ruslandip Naalagaaffiit Peqatigiit pisortaata tikeraarnerani Kyivimut saassussinertik uppernarsaraa

Uuliap akuiarneqanngitsup 25 procentia Ruslandimeersuusoq, kisitsisit EU-p naatsorsueqqissaartarfianit Eurostatimeersut takutippaat.

Kisianni soorlu ilimagineqareersoq nukissiuutinik Ruslandimeersunik EU-p Ruslandimut pillaatitut iliuuserisaani tamakkiisumik mattussisoqanngilaq. Ukrainep præsidentia Volodymyr Zelenskij sivisuumik taama kaammattuuteqarsimagaluarpoq.

EU-mi nunat ikummatissanik assigisaannillu Ruslandimit pisinerminni Putinip Ukrainemi sorsunneranik aningaasaleeqataasut taanna isumaqarpoq.

Polenip Baltikumimilu nunat Zelenskij tapersersorpaat. Nunalli nukissiuutinik pisariaqartitsilluinnartut Tysklanditut ittut, nukissiuutinik Ruslandimeersunik isumalluuteqarunnaariartorluni allanik periarfissarsiortoqartariaqartoq isumaqarput. EU-mi aningaasarsiornermi kinguariartortoqarnissaa taamaaliornikkut pinngitsoortinneqarsinnaasoq Tyskland isumaqarpoq.