EU-p iliuuserisaa Mary Simonip iluarinngilaa
Inuit Tapiriit Kanatami præsidentiat, Mary Simon oqarpoq EU-miit mattunniarneqarneq inuit isumakuluutigigaat ammillu akiisa qaffannissaannik tamanna kinguneqassasoq ilimagalugu.
- Orsussaq allallu pisariaqartitat akitsoriartuinnartillugit piniarniarneq imminut akilersinnaajuaannassanersoq apeqqusertariaqarpoq. EU-mi siunnersuutigineqartoq naapertorlugu naggueqatigiit Inuit puisittaasa amii immikkut isigineqassapput, qanorli tamanna isumaqarnersoq naluarput, Mary Simon oqarpoq.
– EU-mi inuppassuit isumaqarunarput inuit ileqqutoqqatik atorlugit piniartut tassa qimusserlutik piniartut unaamillu sakkullit. Ullutsinnili aallaaseqarlutalu qamuteralannik angallateqarpugut, kulturit allat assigalugit uagut kulturerput allanngoriartormat. Taamaammat ullutsinni taakkua atorlugit piniarneq ileqqorilernikuuarput. Kattuffik, Inuit Tapiriit Kanatami EU-p killilersuiniarnera qanorpiaq akilinermi piniartunut sunniuteqassanersoq itisiliilluni paasiniarniarpaa. Canadami ministeriunerup, Stephen Harperip akilinermi puisinniartartunut tapersersuinini arlaleriarluni takutittareerpaa.
