EU-p arfattassiinerit isumaqatigiissutigerusuppai

Nunat tamalaat arfanniarneq pillugu ataatsimiititaliarsuannut qanorluunniit Danmarki peqataajumanngitsigigaluarpat, EU arfanniarneq pillugu isumaqatiginninniassaaq, tamannalu EU-mi avatangiisinut kommissærip Stavros Dimasip sulissutigissavaa taama Stavros Dimasip oqaaseqartittagaa Barbara Helfferich ritzaumi issuarneqarpoq.

Taassuma taama oqarnerminut tunngavigaa, Anders Fogh Rasmussenip itigartitsissutigimmagu Kalaallit Nunaanni qanoq amerlatigisunik arfattassiisoqarnissaa EU kommissionip nunarsuarmiunut allanut isumaqatigiissutigissanngikkaa. Taassuma taama itigartitsinerminut tunngavigaa, EU-p avatangiisit pillugit kommissæriata siunnersuutigimmagu, Danmark EU-milu ilaasortat nunat allat arfanniartarnermut isumaqatigiinniartarnerat EU kommissionimit ingerlanneqartalissasoq.

Barbara Helfferichip oqaasii naapertussagaanni, EU-mi avatangiisinut ministerit ippassaq ataatsimiinneranni Danmarki assut mattusimasutut oqaatigisariaqarsorineqarpoq.

Taamaattumillu EU kommissionip siunnersuummini aalajangiusimavaa maajimi IWC ataatsimeersuartitsilerpat EU sinnerlugu aallartitaqartoqassasoq.

Illuatungaatigulli EU-mi ilaasortat nunat arlallit Danmark taperserpaat

Kalaallit Nunaat Savalimmiullu aqqutigalugit nunani EU-mi ilaasortani Danmark tassatuaavoq arferit neqaasa aningaasatigut isertitsissutigineqarnissaannut soqutiginnittutuaasoq.

Østrigelu tassaavoq arfanniarnermut akerliusorujussuaq, taama aamma ippoq Danskit sinnerlugit EU-mut aallartitaat Dan Jørgensen, taanna ilaatigut ima oqarpoq:

- Arferit anniartinngiivillugit toqunneqarsinnaarpianngillat, arferillu tusaasinnaasatsinnik nilliasinnaagaluarpata arfernik toqoraaneq qangarsuarli unitsinneqareersimassagaluarpoq, Dan Jørgensen oqarpoq.