EU nutaamik isumaqatigiissusiorpoq

EU-mi nunat ilaasortaasut 27-t naalakkersuisa siulittaasui, 2005-imi siunnersuutaat Frankrigimi Hollandimilu taasissutigineqarmat itigartissutaasup taartissaannik ullumi isumaqatigiissuteqartoqarpoq.
Allattoq Elisa Isaksen
oktobarip 19-at 2007 10:41

Isumaqatigiissutigineqartoq malillugu maannakkumiit ukiut marluk qaangiutiinnartut EU aalajangersimasumik siulittaasoqalissaaq ataatsimillu nunanut allanut ministereqalissalluni.

EU-mi qinikkat ataatsimiititaqarfianni nunat ilaasortat pinngitsooratik ilaasortaatitaqartarnerat 2014-imi atorunnaarsinneqassaaq, nunallu ataasiinnaalluunniit akuersinnginnermigut siunnersuummik tunuartitsisinnaanera arriitsumik atorunnaarsikkiartuaarneqassalluni.

Isumaqatigiissut Danmarkimi partiit EU-mut atarusuttut tapersersorpaat, Dansk Folkepartiilli isumaqatigiissutip qinersissutigineqarnissaa piumasaraat.

Isumaqatigiissutip Danmarkip immikkut nunatut nunap iluani inatsisinik maligassaqartitsisinnaaneranik EU-mut nuutsinissaanik kinguneqassanersoq statsministerimik isumasioqatigiissutigineqarnissaa

Dansk Folkepartiip folketingimut ilaasortaatitaata, Morten Messerschmidtip piumasaraa.

EU-mut ilaasortat nunat annerit tallimat innuttaasa isumaqatigiissutip qinersissutigineqarnissaa piumasaraat, Jyllands-Posten allappoq.

Tuluit aviisiata isumasiuinerata takutippaa Tuluit Nunaanni, Frankrigimi, Spaniami, Italiamilu innuttat 70 procentiisa isumaqatigiissut qinersissutigeqqugaat.

Maannaagallartorli Irlandimiut kisimik qinersissutigissamaarpaat – immaqalu qallunaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq