EU Nunavummit akiniarneqalerpoq
Puisit amiinik EU-mut eqqusseqqusiunnaarneq akillugu imigassat aalakoornartortallit EU-meersut Nunavummut eqquteqqusaajunnaartinnissaat, Eva Aariap eqqarsaataaniippoq.
Nunat tamat niueqatigiinnikkut maleruaqqusaat unioqqutinngikkaluarlugit imigassat aalakoornartortallit Nunavummut eqquteqqusaajunnaartissinnaagai, aviisimi The Times Colonistimi taamatut issuarneqarpoq.
Nunavummi inatsisartut ataatsimiinnerminni marsip ulluisa aqqarnganni pisumi, imigassat aalakoornartortallit EU-mit pisut Nunavummut eqquteqqusaajunnaarnissaannik siunnersuut aalajangiiffigaat. Aalajangernermi Nunavummi naalakkersuisut taaseqataanngillat.
Nuna tamat niunernikkut kattuffissuata WTO-p akileraartarnikkut akitsuutillu pillugit malittarisassaanik unioqqutitsinertut assersuunneqarnissaa Eva Aariap mianersoqqussutigaa.
Imigassat aalakoornartortallit Nunavummut eqquteqqusaajunnaartinneqassappata, tamanna puisit amiinik EU-mut eqqusseqqusiunnaarnerup atorunnaarsinneqarnissaanik isumaqatiginninniarnernut akornusiisinnaasoq ernummatigineqarpoq.