EU nammineq maleruaqqusaminik unioqqutitsigunarpoq

Puisit amiinik tunisassiornermut inerteqquteqarnissamik EU-p siunnersuutaa, EU-p nammineq maleruaqqusaliaannut unioqqutitsinerugunarpoq. EU-p ministerrådianut inatsisilerinermik siunnersortit taama isumaqarput.
Allattoq Lotte Holm
marsip 04-at 2009 11:01

Inatsisilerinermut siunnersortit allakkiamik februaarip 19-ianni nassitsipput, tassanilu naliliipput, puisit amiinik tunisassiornermik EU-p inerteqquteqalerniarnera EU-p aalajangersagaanut naapertuutinngitsoq. Danmarkimi nunanut allanut ministeeriaqarfik taama ilisimatitsivoq, taamaattorli allakkiap takunissaa ajornartinneqarpoq, kikkunnut tamanut takusassiaanngitsutut taaneqarluni.

Tamannali siunnersuutip taamaatiinnarneqarneranik kinguneqanngilaq, taamaattorli allakkiaq qanoq sunniuteqassanersoq nalunarallarpoq, qularnanngitsumilli tamanna Kalaallit Nunaata Danmarkillu soqutigisaannut iluaqutaasinnaavoq.

Inatsisilerinermik siunnersortit, puisit amiinik eqqusseqqusiunnaarniarnerup, nunat tamalaat niueqatigiinnikkut suleqatigiiffianni malittarisassanut unioqqutitsisuunersoq ilanngullugu nalilerniarpaat. Nalilersuineq qaqugu piareersinnaassanersoq paasissutissiissutigineqanngilaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq