EU-mut isumaqatigiissut atsiorneqarpoq
Nunatta EU-llu suleqatigiinnissamik isumaqatigiissutissartik ullumi atsiorpaat. EU-mi avatangiisit pillugit ministerit Luxemborgimi ataatsimeeqatigiinneranni tamanna pivoq. Josef Motzfeldt nunarput sinnerlugu atsiortuuvoq.
Suleqatigiinnissamik isumaqatigiissut naapertorlugu nunarput siunissami 187 millioni koruuninik EU-mit siunissami ukiumut tapiiffigineqartalissaaq.
Isumaqatigiissutip aappaa aalisarnermut isumaqatigiissutaavoq. Isumaqatigiissutip imarisassai qaammat kingulleq Ilulissani isumaqatiginninniutigineqarput.
Isumaqatigiissutit taakku marluk naapertorlugit nunarput 318 millioni koruuninik ukiumut isertitaqartassaaq. Inatsisartuni ilaasortat isumaqatigiissutinik taakkunannga akuersisussaapput naatsorsuutigineqarporlu ukiaru inatsisartut ataatsimiinnissaanni isumaqatigiissutit eqqartorneqassasut.
