EU-mut ilaasortaasinnaaneq nalilersoqquaat
Nunatta EU-mut ilaasortanngoqqinnissani nalilersoqqittariaqarpaa, taama Demokraatit isumaqarput.
Tamanna Inatsisartuni ippassaq apeqquteqaateqarnerminni ersersippaat, tassami Palle Christiansenip ilaasortaanerup iluaqutissartaasa ajoqutissartaasalu misissuiffigineqarnissaat siunnersuutigaa.
- EU sanaartornermut tunngasunut aningaasaateqarfissuaqarpoq maanilu sanaartugassanik kissaatigisaqarpugut, soorlu nunatsinni sumiiffinni assigiinngitsuni erngup nukissiorfiliorniarnerit, sumi tamaani mittarfiliorniarnerit aamma inissiat pioreersut nutartertarialerujussuupput. EU-mut ilaasortanngornitsigut EU-p sanaartornermut aningaasaateqarfiinut ammaanneqassagaluarpugut. Taamaattumik misissuisoqarnissaa kissaatigaara. Ullumikkut EU-p avataaniilluta OLT-mik aaqqissuussinerup iluaniinnitsigut aningaasarsiornermut atatillugu suut iluaqutaappat suullu ajoqutaappat imaluunniit ilaasortanngornitsigut suut iluaqutaassappat suullu akornutaassappat. Imaassinnaavoq raajartassiissutit arlalinnik millionisissutigisarivut, aammali sanaartornermut atatillugu aningaasat qanoq amerlatigisut annaasarnerivut ilanngullugu nalilersorneqartariaqarput, Palle Christiansen oqarpoq.
Tamakkua maanna oqallisigineqarnissaat sooq pisariaqarnersoq aperineqarami Palle Christiansen oqarpoq tamanna pisariaqartoq nunatta aningaasaqarniarnera pitsaavallaanngimmat. Innuttaasullu kiffartuunneqarnissaminnik qaffasissumik piumasaqarmata aningaasanik isaatitsivissanik nassaartoqartariaqarmat aamma aningaasartuutit iliuuseqarfigineqarumanngimmata. Periarfissallu ilagaat EU-mut ilaasortanngornissaq aningaasanik pissarsiumalluni.
Palle Christiansen aperineqarami aningaasat pissutigiinnarlugit nunarput EU-mut ilaasortanngoqqittariaqarnersoq, oqarpoq pingaarnersiuinermi aningaasat pingaarnerpaatinneqartariaqartut.
Aamma soorlu Åland innuttakikkaluarluni EU-mut ilaasortaavoq, aamma sooq ilaasortaarusunnersut paaserusuppara.
- Misissuinikkut ersersinneqassagaluarpat EU-mut ilaasortaaneq maanna OLT-mik aaqqissuussinermit pitsaanerusoq taava ilaasortanngornissaq tapersersorluinnassagaluarpara, Palle Christiansen oqarpoq.
