EU-mut aalisagartassiissutit unitsikkallarneqarlik
- Taama sakkortutigisumik kaammattuuteqassalluni peqqutissaqalersimavoq EU-mi ilaasortat Kalaallit Nunaata Arfanniarneq pillugu Ataatsimiititaliarsuarmi, IWC-mi arfattassinneqarnissaraluatsinnik ajoqusiinerata kingornagut, Aqqaluk Lynge oqarpoq, nangillunilu;
- Tamatuma saniatigut ilisimavarput, aataavaqqat amiinik EU-rmiunut eqqusseqqusaannginnerup kalaallit piniartut aningaasarsiornikkut annertuumik eqqorai.
- Taakkuinnaalluunniit assersuutigalugit taamatut EU-p iliuusaa allaanngilaq EU-p niuernikkut Kalaallit Nunaat sorsulersimagaa, taamalu pissusilersorneq kanngunarluinnarpoq, naak nunarput OLT aqqutigalugu EU-mut attaveqartut ilaattut, torersumik pissusilersorfigineqartussaagaluartoq. ICC-p pissutsit taamaattut assut toqqissisimanngissutigai, Aqqaluk Lynge-lu nangippoq: Nunat inoqqaavisa pinngortitap pisuussutaanik uumassusilinnik qangatuut atuisarnerinik EU-p assortuilersimanera kinguneqartinneqartariaqarpoq. EU-p akerliunermini misigissutsit toqqammavilersuutigai, taamaattumillu ilisimatuussutsikkut sulianik toqqammaveqanngitsoq uppernassuseqanngilaq. Pisassanik naatsorsuilaarunik paasissagaluarpaat Kalaallit piniartuisa arferit amerlassusaat ulorianartorsiortissinnaanngilluinnaraat, killormulli oqartariaqarpugut EU-p Atlantikup Avannaani imartatsinnilu aalisapilunnerata arferit nerisassaqarniarnerat annertuumik sunnersinnaagaa.
- Taamaammat piffissanngorpoq Kalaallit Nunaata EU-rmiunut tukkoqaluni aalisagartassiisarnerata isummerfigeqqittariaqarnissaa imaluunniit pisassiisimaneq unitsikkallarneqartariaqarpoq pisuussutinik uumassusilinnik atuinermut isumaqatigiissutsit iluarsitsiillugit, Aqqaluk Lynge naggasiivoq.
Aqqaluk Lyngep sakkortuumik qisuariarneranut pissutaavoq ippassaq Arfanniarneq pillugu Ataatsimiititaliarsuup ataatsimiinnerani danskit kalaallillu qulinik qipoqqartassinniarneqarnerannut EU-mi ilaasortat akerliunerat.
Ataatsimiititaliarsuarmi ilaasortat 80-it akornanni Danmarki ilanngunnagu EU-mi ilaasortat 20-t akerliummata kalaallit qipoqqartassinneqanngillat.
