Aningaasat ukiumut 187,5 millioni koruunit EU-p aningaasaliissutigisalerniagaat ilinniarsimanngitsut ilinnialernissaannut, ilinniarsimasullu pikkorissarnissaannut atorneqarnerussapput 2012-miillu ilinniagaqarneruniartunut atorneqalissapput.
Aningaasat ukiumut 187,5 million kronet EU-p ukiuni arfineq-marlunni nunatsinnut aningaasaliissutigisalissavai, tassa ukiuni arfineq marlunni katillugit aningaasat 1,3 milliardit nunatsinni ilinniartitsinissamut atorneqartussaapput.
Aningaasat taakkua ulluni makkunani imaaliallaannaq pissarsiaanngillat, siornali EU-mut isumaqatiginninniarnermut atatillugu aalisakkanut pisassiissutinut ilanngullugit isumaqatigiissummut ilanngunneqarnikuupput.
Massakkullu Barrosop Ilulissanut tikeraarneranut atatillugu taakkua immikkut ilinniartitseqqinnissamut atugassatut uppernarsaalluni atsioqatigiinnikkut isumannaarneqareerput.
Inuutissarsiornermut pisortaqarfimmi atorfilik fuldmægtig Line Resting-Jeppesen KNR-mut oqarpoq aningaasat taakkua Piareersarfiit ingerlataannut ilanngunneqartussaassasut allatigullu ilinniagaqareersunut pikkorissaaqqaarnernut aamma atorneqartussaallutik.
Kisianni tassa aningaasat taakkua siornali EU-mut isumaqatigiissusiortoqarmat pissarsiarinissaat ilisimaneqalereermat aningaasanut inatsimmut ilanngunneqareerput.
Tamakkua pillugit naalakkersuisut siulittaasuat Hans Enoksen ima oqarpoq:
-Nalinginnaasumik ilinniarnerit soorunalimi ingerlanneqassapput kisianni avataaninngaaniit tamakkua pisariaqartitagut annertuut isumaqarpunga nukittorsarlugit tassa massakkut aallartittariaqalersut.
Kisiannili annerusumik ilinniarnerit soorlu nakorsanngorniarnerit assigisaasalu maanaannaq unitsinneqartarnerat annikillisartariaqartoq Hans Enoksenip oqaatigaa, kisiannili Line Resting-Jeppesen oqarpoq annerusumik ilinniagallit ikorfartorneqarnerulernissaat aatsaat 2012-mi aallartinneqartussaasut taamaammallu ilimagineqarsinnaanngilaq, annerusumik ilinniagaqartut ilinniarnerminni annerusumik aningaasarsiaqartitaanerulernissaat, allatigulluunniit ikorfartorneqarnerulernissaat ukiuni qaninnerni piumaartoq.