EU-mi kommissærit ullumi toqqarneqarput
Connie Hedegaard EU-imi silap pissusaa pillugu kommissæritut sulinermini allanik suliaqassanngilaq, suliami saniatigut Avatangiisinut nukissiuuteqarnermullu oqartussaaffiit akisussaaffigissanngilai.
Connie Hedegaard atorfittaamini Bruxellesimiittumi nammineq qullersaqarfeqassaaq atorfilittaqassallunilu.
EU-mi nunat ilaasortat naalakkersuinikkut suliaqarnerminni silap pissusianik eqqarsaateqarnerunissaat Connie Hedegaardip suilassaasa pingaarnersarissavaat.
EU-mi nunat ilaasortat ukioq 2020 tikitsinnagu CO2-mik nunat aniatitsinerat minnerpaamik 20 procentinik annikillisarneqassasoq siunertarineqarpoq, taamaalilluni 1990-mi CO2-mik aniatsitsinermut sanilliussilluni 20 procentimik annikilliliisoqarniarpoq.
EU-p kommissiuuniani siulittaasup, José Manuel Barrosop kommisærit 27-t ullumi ilisaritikkamigit silap pissusaa pillugu EU-imi assigiimmik politikkeqarnissaq Connie Hedegaardip suliarisinnagaa oqarpoq.
EU-imi kommisærit 27-t ullumi ivertinneqarput taakkunaannga arnat qulingiluat kommisærinngortinneqarput.