EU-mi ilasortat paasisitsiniaavigineruniarpaat
Aalisarnermut piniarniarmullu tunngasuni, soorlu piujuaannartitsinissaq tunngavigalugu puisinniarnermi arfanniarnermilu, misigissutsit atorlugit EU-p oqallinnermut akuliuttarnera oqallisigineqassaaq. Inatsisartut siulittaasuat Ruth Heilmann ima oqarpoq.
- Oqaluuserisassat iserfigisassasut assigiinngitsut pingaaruteqarput, uterfigisussaagatsigit EU-mut tunngasut, apriilimi kingullermi ataatsimiinnitsinni eqqartukkavut, oqarpoq.
Nunani avannarlerni killerni inuussutissarsiornikkut, aalisarnikkut aamma piniarnikkut atugarisat qaammarsaatiginiarlugit EU-mi ilaasortat ilaat taamanikkut ataatsimeeqatigineqarput.
- Pissutsinik ilisimatinniarlugit ataatsimeeqatigaavut, isumaqaratta EU-p paasisimasai annikitsuusut, Ruth Heilmann oqarpoq.
Isumaqarporlu paasisimasaqarnerunissaat suliniutigineqartuartariaqartoq.
- EU-mi ilaasortallu ataatsimeeqatigiinneq taanna ukiumoortumik paasisitseqatigiittarnissamik akuerseqataaffiuvoq. Taamaattumik maanna Nunat Avannarliit Killerni aallartitat ataatsimiinnitsinni EU-meersut naapeqatigeeqqinnissaat eqqartoqqittussaavarput, Ruth Heilmann oqarpoq.
Nunatsinni inatsisartunut ilaasortat, Savalimmiuni Lagtingimit aallartitat aamma Islandip Altingianit aallartitat, Islandimi Grundarfjordurimi ippassaq unnukkut ataatsimiilerput sisamanngorneq ilanngullugu ataatsimiissallutik.
Ataatsimiinnermi norgemiut sverigemiullu aallartitaqarput.