EU-imi aalisakkat nungutsaaliorniarneqalerput

EU aalisakkanik nungutsaaliuiniarluni nutaamik inatsisiliornialerpoq.

Aalisakkat mikisut, qaleruallit aamma aalisakkat allat pisarerusunneqanngitsut, aalisariummit avammut eqqaanarneqartarnerat inerteqqutaalissaaq – EU-mi aalisartut pisaat tamakkerlugit umiarsualivimmut tulaanneqartalissapput.

Aalisarnermi pisarineqartartunit igiinnarneqartartut amerlassusaat allanngorartorujussuuvoq. Pisat 10 procentiinit 60 procentiinut ilaatigullu 90 procentit angullugit igiinnarneqartarlutik.

- Igiinnarneqartartut toquinnartarput iluaqutigineqassanatillu, EU-p aalisarnermut kommissæria Joe Borg (Bårk) oqarpoq. Taamaattumik EU-mi kommissæreqatini paasitissimavai aalisakkat nungutaassanngippata taama iliuuseqartoqartariaqartoq. Tassami pisassiissutinik ullunillu aalisarfiusussanik aalajangersaanerit naammanngimmata.

Nunat aalisarnermik ingerlatsiviusut, soorlu Canada-p Islandip aamma Norgip aalisarnermi igitaqartannginnissaq ukiuni arlaqalersuni ingerlatereerpaat.

Nunani tamakkunani immani itisuuni aalisarneq ingerlanneqartarpoq taamalu aalisakkat assigiiaat aalisarneqarnerusarlutik. Kisianni sinerissap qanittuani aalisarnermi aalisakkat assigiinngitsorpassuit pisarineqartarput.

EU-p aalisarnermut kommissæriata aalisartut aalisarnerminni allanik atortoqalernissaat sulissutigerusuppaa, soorlu qalorsuarnik nigartaqqortunerusunik atuilersillugit. Tassami pisat tamarmik tulaanneqartalernersigut igitassat initoqutaasussaammata kiisalu igitassat aserorternissaannut aningaasartuuteqartariaqarmat.

Kisianni aalisartut eqqaajuaannarnikuusut qanoq ililluni eqqaannginnersut nakkutigineqarsinnaava?

Tamanna Joe Borgip akissutissaaleqissuppaa, oqaatigaluguli aalisarnermik nakkutilliineq nunat ataasiakkat akisussaaffigigaat EU-milli nakkutigineqartumik.

Siunnersuutip aasartinnagu piareerneqarsinnaanissaa naatsorsuutigineqarpoq.

Nunatsinni pisanik maangaannaq igitsisoqaqqusaanngilaq, kisianni allatut ajornartillugu malittarisassaq taanna saneqqunneqarsinnaavoq.