ETA siorasaarivoq

Peqqarniisaarniat Spaniami nunap immikkoortortaanit Baskerlandimeersut ETA eqqisseqatigiikkallarnissamik Spaniap naalakkersuisuinik isumaqatigiissutertik ullumimiit atorunnaarsippaat.

ETA taama nalunaartoq aviisi Politiken allappoq.

Suli tigusarinnittoqartarmat, naalliutsitsisoqartarmallu kiisalu malersuisoqaannaarmat eqqisseqatigiikkallarnissamik isumaqatigiissut atorunnaarsikkitsik ETA-p nalunaarutigaa.

ETA-mik isumaqatigiissuteqarniarlutik Spaniami ministeriunerup José Zapatero-p siorna juunip qaammataani nalunaarutigaa, isumaqatigiinniartoqartorli pisortatitigoortumik uppernarsarneqarnikuunngilaq.

Illuatungaatigut oqaatigineqartarpoq isumaqatigiinniartoqartarsimasoq, sulili inernilerneqarsimanngitsut.

Baskerit Spaniamiullu akornanni aaqqiaginnginnerit ukiuni 40-ni ingerlasimapput, inuillu maannamut 800-nit amerlanerusut toqutaasimallutik.