Estlandip ministeriunera peqquserluttuliorsimaneragaanini pissutigalu tunuarniuteqartoq

Estlandip ministeriunera, Juri Ratas, ministeriunertut tunuarniuteqarpoq. Taanna peqquserluttuliorsimasutut pasineqartoq soorlu aamma partiia peqquserluttuliorsimasutut pasineqartoq, nutaarsiassaqartitsivik Ritzau allappoq.

Ratasip tunuarniuteqarnini nalunaarutiginiarlugu Estlandip præsidentianut pingasunngornermi ullaakkut orniguttoq, nutaarsiassaqartitsivik BNS allappoq.

Suliaq politiinit misissuiffigineqaleruttortoq

Ministeriuneq taassuma peqquserluttuliorsimaneragaanerata misissuiffigineqaleruttornerani tunuarniuteqarpoq. Estlandimi illoqarfiit pingaarnersaanni Tallinimi sanaartornerit ilaasa aningaasalersorneqarnerannut atatillugu peqquserluttuliortoqarsimanersoq misissorneqaleruttorpoq.

Illuutileqatigiiffik Porto Franco politiinit misissuiffigineqaleruttorpoq, illuutileqatigiiffimmi taanna aningaasanik amerlasuunik naalagaaffimmit attartorsinnaasimavoq, Tallinillu kommunianit pissarsiffiulluartumik kingorna aamma isumaqatigiissusiorsimalluni.

Illuutileqatigiiffiup piginnittuata angutaa Estlandimi pisuujunerit ilaanniippoq ilisimaneqarluartuullunilu. Taanna Ratasip partiianut aningaasalersuilluartarsimavoq.

Partiip iluani marlunngornermi ataatsimiittoqareersorlu, Juri Ratasip ministeriunertut tunuarniuteqarnissani nalunaarutigaa. Peqquserluttuliorsimasutut pasilliutit tassani eqqartorneqarput.

Juri Ratas Estlandimi 2016-imili ministeriuneruvoq.