Esperanzap inuttai akuliukkusupput

- New Orleansimeersuuvunga, Deepwater Horizon-illu ajutoorneratigut, New Orleansimi aningaasarsiorneq, aalisarneq avatangiisillu qanoq aserugaatigisut takuakka. Maniippunga, New Orleansimi misigisatsitut Kalaalit Nunaanni misigisaqartoqannginnissaanik qulakkeerinneqataasinnaallunga neriuutigalugu, Amerikamiu Hannah Mexicop kangerliumanersuani siorna ajutoornersuaq eqqarsaatigalgu, taama KNRimut oqarpoq. Taanna Greenpeacemut ukiuni arfineq marlunni attuumassuteqarsimavoq.

Siunertartimmi angusallugu uppernerpaat? Tuluit Nunaanneersoq Keith ima oqarpoq:

- Qanoq iluatsitsitigissanerluta naluara. Kisianni ukiut ingerlanerini sorsuttarsimaqaagut. Misiliiuarutta iluatsitsissaqqaarpugut. Immaqa massakkuunngikkaluartoq, kingusinnerusukkulli.

Soormi Nunatsinni avatangiisit ajoqusernaveersaarnissaat kalaallit nammineq isumagippassuk. Greenpeace akuliutinngiinnaruni ajunnginnerunngikkaluarpa?

- Naamerluinnaq. Nunarsuup inui misiginneqatigigutsigit iliuuseqartariaqarpugut. Kalaallit kisiisa, tyrkerit kisiisa amerikamiiulluunniit kisiisa eqqarsaatigissangilagut, nunarsuulli inui tamaasa. Aamma uuliamik maqisoorneq nunarsuarmut tamarmut qanoq sunniuteqassanersoq eqqarsaatigisariarparput, Esperanzamit inuttat ilaat Tyrkiameersoq akivoq. Keith-llu tuluusup taperserpaa.

- Nunami maani tusamanerlunneqaratta pasilluarsinnaavara, kisianni uanga ilanngutinngikkallarama tamakkua pipput. Manna paarilluarneqartariaqartoq nunap inuisa takusinnaassagaat neriuutigiinarpara. Kusanaqigami, uuliamillu maqisoortoqassagaluarpat ajunaarnersuussaaq. Taamaammat qaquguunersoq tapersersulissagaatigut neriunarpoq, tuluk Esperanza-mittut ilaat Keith oqarpoq.