Esperanza-mit pisut pillugit nalunaarput
- Erseqqarippallaanngikkaluarpoq, umiarsuilli ungasikkaluartut takusinnaavavut, Sune Scheller, Greenpeace-imeersoq oqarpoq. Taanna oqarpoq qillerivik Leiv Eiriksson Esperanzamit ullut marluk matuma siornatigut sumiissusersineqarsimalli malinnaavigineqarsimasoq.
Oqaluttuarpoq Greenpeacemeersut Leiv Eirikssonip inuttai attaveqarfigisimagaat.
- Qillerivik Leiv Eiriksson Esperanzamiit raatiukkut attaveqarfigineqareerpoq, umiarsuilli taakku marluk imminnut qanippallaannginnissaat matumani isumaqatigiissutigineqaannarpoq, Sune Scheller oqarpoq.
Taassuma ilanngullugu oqaatigaa Esperanza qillerivimmut qanillattornerunissamik pilersaaruteqanngitsoq.
Esperanzami inuttat katillugit 30-t missaanniipput, Greenpeace-ikkormiummitami qanorippat?
- Cairn Energyp Issittup imartaani uuliasiornissamik pilersaaruteqarnera tungitsinninngaanniit soorunami ajusaarutigaarput, naallu Namminersorlutik Oqartussat oqaatigigaluaraat isumannaallisaaniarnermut malittarisassat malinneqartut, isumannaallisaanissamik malittarisassat arlallit malittarineqannginnerat aamma ajuusaarutigaarput. Malittarisassallu malinneqannginnerat takussutissaqartikkatsigu tamanna saqqummiunniarsariniarparput, Sune Scheller oqarpoq.
Greenpeace-imi isummani Kalaallit Nunaannut saqqummiukkusuppaa:
- Isumaqarpunga, Cairn Energy-p uuliamik maqisuussagaluaruni qanoq pilersaaruteqarnera inuiaat kalaallit politikeriilu eqqumaffiginerusariaqaraat. Tuluit naalakkersuisuiniit pappialami ullaaq takuarput, uuliamik maqisoortoqassagaluarpat saliinissaq ajornartoq. Isumaqarpunga, tuluit misissuisitsinerminnit inerniliussaannut illuatungiiliisutut uppernarsaatit pigisai kalaallit politikeriisa takujumasariaqaraat, Sune Scheller oqarpoq.
Umiarsuup alapernaarsuutip Vædderenip Esperanza qanittunnguullugu ingiallorpaa. Jan Bøgsted Kangilinnguani sakkutoqarfimmi sakkutuut naalagaasa allaffianni pisortaavoq. Taanna oqarpoq, umiarsuit nunat tamalaat imartaanniittut, taamaammallu Vædderen tamaani oqartussaaffeqanngitsoq. Taamaammat Vædderenip suliassaa suungitsunnguuvoq.
- Vædderenip maanna imartami tamaani angalaarpoq, susoqarneranillu malinnaalluni. Tassatuaappullu Kangilinnguani Sakkutooqarfiup maannamut suliarisai, Jan Bøgsted oqarpoq.
Radioavisimiit oqaluttuareriikkatsitut, Greenpeacep umiarsuaa Arctic Sunrise aamma kitaata imartaaniippoq, Sune Schellerilli oqarneratut taanna kinguussaasimavoq.
