Esmar Bergstrøm: Tupernik tunniussisarneq unitsilli
Esmar Bergstrøm Kommuneqarfik Sermersuumi Tungiuinermut Ataatsimiititaliami siulittaasuugallarpoq, taannalu oqarpoq, tupernik tunniussisarneq nammineq aatsaat tusarlugu.
Kommunimi ingerlatsivik Esmar Bergstrømip qinnuivigisimavaa tupernik tunniussisarunnaaqqullugu, tamanna sermitsiaq.ag-ip nittartagaani ilisimatitsissutigineqarpoq.
Angut angerlarsimaffeqanngitsoq tupermi kommunip tunniutaani sapaatip akunnerini arlalinni ungasinngitsukkut najugaqarpoq, aanaartoornini pissutigalugu Dronning Ingridip Napparsimmavissuani uninngareerluni.
Tamatuma paasinerata kingorna aamma saqqummerpoq, angut alla napparsimmavimmit angerlarnerminut atatillugu Kommuneqarfik Sermersuumit tupermik 2007-imi neqeroorfigineqarsimasoq.
Tamanna unitsittariaqarpoq, Esmar Bergstrøm isumaqarpoq:
- Naatsumik akiinnarsinnaavara, taamaaliortoqartarnera uanga tulluartuusorinngilara.
Esmar Bergstrøm saaffiginnissutiminut suli akissutisinngilaq. Tungiuinermut ataatsimiititaliaq aasaanerani feriareerluni uterpat nassuiaanneqarnissani kissaatigaa.
