Esmar Bergstrøm neqeroorfigitippoq

Inatsisartuni Nuullu kommunalbestyrelseani ilaasortaq partiiminillu Demokraatinit sapaatiumalli anisoq Esmar Bergstrøm, partiinik assigiinngitsunik maannamut oqaloqateqareersimalluni aammalu neqeroorfigineqarsimalluni ullumi oqarpoq.

Esmar Bergstrøm Demokraatinit sapaatiummalli anisoq oqarpoq partiit ilaannit suleqatiginninnissamik neqerooruteqartoqareeraluartoq taamaattoq ullut tulliuttut eqqissilluni eqqarsaqqissaarnissamut atorniarini.

- Demokraatinit anivunga, kisimiillungali sulerusunnginnama allanik suleqateqalernissara eqqarsaatigaara, Esmar Bergstrøm ullumi taama oqarpoq.

Partii sorleq suleqatiginninnissamik neqerooruteqarsimanersoq suli aamma oqaaseqarfigerusunngikkallarnerarpaa.

Siumut Inatsisartuni gruppiani siulittaasoq Agnethe Davidsen radioavisimut oqarpoq Esmar Bergstrøm Siumukkunnit oqaloqatigineqareersimasoq, Siumukkunnullu tikkilluaqqusaasoq, taamaattorli aamma oqaatigaa Bergstrømip kikkunnik suleqateqarumanissi nammineerluni soorunami aalajangingassarigaa.

Esmar Bergstrømip Demokraatinit anigami siunissami qanoq suleriaqqinnissi pillugu ullut 14-it missaanni eqqarsarfissaqarumanissi ataasinngormat oqaatigaa.

Bergstrømip Inatsisartut ataatsimiititaliaanni Demokraatit sinnerlugit ilaasortaaffigisimasani ippassaq marlunngornermi tamaasa annaavai, ilaasortaaffiillu Demokraatinut taamaalillutik uterteqqinneqarput.