Esmar Bergstrøm ataatsimiitialiani ilaasortaaffii

Inatsisartuni Nuullu kommunalbestyrelsiani Demokraatit sinnerlugit ilaasortaasoq, Inatsisartuni kommunemilu ataatsimiititaliani arlaqartuni aamma ilaasortaaffeqartoq Esmar Bergstrøm Demokraatinit anivoq, anineralu pissutigalugu ataatsimiititaliani inissisimanera isummerfigineqartussanngussaaq. Ataatsimiititaliat ilaasortaaffiisa Demokraatinut utertinneqarnissaat Demokraatit sulissutiginiarpaat. Aalajangertoqarnissaatali tungaanut ataatsimiititaliani sulinini ingerlatiinnassagini Esmar Bergstrøm oqarpoq:

- Ataatsimiititaliani assigiinngitsuni ilaasortaavunga, taakkulu sapinngisamik peqataaffigissassavakka periarfissaqaraangama. Soorunamilu periarfissaqanngikkaangama sinniisunnut tamanna nalunaarutigisassavara.

Esmar Bergstrømip Nuummi kommunalbestyrelsimi ataatsimiititaliani Demokraatit sinnerlugit ilaasortaaffini imaaliallaannaq qimassinnaanngikkini erseqqissaavoq:

- Tamanna pisinnaavoq kommunemi malittarisassanik aatsaat allanngortitsinikkut.

Inatsisartuni ataatimiititaliani ilaasortaaffimmini Inatsisartut aalajangernissaata tungaanut suliinnarnissi naatsorsuutigaa.

Esmar Bergstrømip ataatsimiititaliani ilaasortaaffiisa Demokraatinut utertinneqarnissaat sorsuutigissamaaritsik Demokraatit siulittaasuat Per Berthelsen oqarpoq:

- Demokraatit issiaviit taakku tigummisarimmatigit Esmar Bergstrømilu Demokraatiujunnaarmat, malittarisassat eqqortut soorunami malillugit taakku Demokraatinut uterteqqinnissaat sulissutigissavarput, Inatsisartuni kommunemilu.

Esmar Bergstrøm Demokraatiniikkunnaarluni nalunaaruteqartoq Inatsisartut ataatsimiittarfianni Demokraatit inaat qimallugu allami issiaveqalissaaq.

Inatsisartuni partiit ilaasortaatitaasa amerlassusaat naapertorlugu partiit oqaaseqartartuinik tulleriaarinermi Demokraatit Siumukkunnut tulliusaraluartut ataatsimik ilanngarnertik pissutigalugu Siumut Inuit Ataqatigiillu oqaaseqartui oqaaseqareeraangata Demokraatit oqaaseqartitaat oqaaseqartalissapput. Esmar Bergstrømip Demokraatinit anisup, Inatsisartut ataatsimiititaliaanni ilaasortaaffiisa Demokraatinut utertinneqarsinnaanissaat Inatsisartuni aalajangerneqassaaq.