Esbjergimi borgmesteri: Kalaallit Nunaat ajugaavoq

Kalaallit Nunaannut Danmarkimi pingaarnertut umiarsualivissarsiornermi Kalaallit Nunaat ajugaavoq. Taama isumaqarpoq Esbjergimi borgmesteri, taassumali aamma uggoraa, Kalaallit Nunaanniit Kalaallit Nunaannullu nioqqutissanik assartuisarneq Aalborgimiit Esbjergimut nuunneqanngimmat.

Pakatsigaluarlunili borgmester Johnny Søtrupip neriulluarnini attatiinnarniarsaraa.

- Soorunami pakatsivunga. Angallannermulli Naalakkersuisoq oqarmat ukiut tallimat qaangiuppata suliariumannittussaarsiuussisoqaqqilerpat ilaanissarput neriuutigalugu, tamanna tuppallersaatigaara. Taamanikkullu aamma peqataassaagut, Johnny Søtrup aviisimut Jydskevestkystenimut ilisimatitsivoq.

Esbjergip umiarsualivianiit Kalaallit Nunaannut nunaanniillu assartuineq ukiup aappaa avillugu annertungaatsiarsimavoq. Esbjergimilu umiarsualiviup pisortaaneranut pingaartumik iluanaarutaavoq, Kalaallit Nunaata Aalborgimut isumaqatigiissutaa sivitsorneqarmat, naak unammillertoqaraluartoq. Taassumami uparuarpaa maannakkut isumaqatigiissut kalaallinut inuiaqatigiinnut sipaarutaasorujussuusinnaasoq.

Aalborgip neqeroorutaa – tassa ukiumut ikinnerpaamik 10 millioni koruunit sipaarneqarsinnaanerannik eqqoriaaneq – pisortaanerup uppernarsarpaa.