Ernisarfiup matulernera Sisimiuni nakorsap tupaallaatigaa
Maniitsumi ernisarsarfiup matuneqarnissaa Sisimiut peqqissaaveqarfiani nakorsanit kamaatigineqarlunilu tupassutigineqartoq Sisimiuni nakorsaq Helle Olsen oqarpoq.
Maniitsumi ernisussiortoq aallarpat atorfiaallamik inuttalerneqassanngilaq, tassalu ernisussiortoq maajip aallaqqataani aallartussaammat ernisarfik matuneqassaaq.
- Maniitsup peqqissaaviani nakorsat ernisitsinermi ikiuunnissamut ilinniagaat Sisimiuni nakorsat aamma ilinniarnikuuvaat, tassa ernisarfinni taakkunani nakorsat pisinnaasaat assiigiipput, erninermut atatillugu immikkut ilinniagaqartoqanngilaq, nakorsaq Helle Olsen oqarpoq.
- Sisimiut peqqissaaveqarfiani nakorsat arlaqartut erninermut atatillugu pilattaanissamut, tassalu qallunaatut kejsersnit-erluni ernisitsinissamut Danmarkimi sapaatip akunneranik ataatsimik sivisutigisumik pikkorissartinneqarnikuupput, Sisimiuni nakorsaq Helle Olsen oqarpoq.
Helle Olsenip uiatalu Jens Olsenip ukiuni arfineq marlunni Sisimiut peqqissaaveqarfiani nakorsatut sulineranni Jens arlaleriarluni Helle Olsenilu ataasiarluni pilattaanikkut ernisitsimapput.
Kisianni Helle Olsenip erseqqissaatigaa pilattaalluni ernisitsisinnaanermut immikkut iliniarneqarnissaq piumasaqataammat, tassalu Sisimiut peqqissaaviani nakorsat pilattaanissamut immikkut ilinniagaqartuunngillat pikkoriffiginagulu.
- Maniitsup Peqqissaaviani ernisarfiup matuneqarnissaanut aalajangerneq qulaaniit taamatut ittussaannartut naalakkerneqarnertut salloqittagaanertullu oqaatigiinnarneqarsinnaavoq. Ernisarfiup matuneqarnissaa pillugu Sisimiut Peqqissaaveqarfiani sulisut akornanni oqaloqatigiittoqarsimanngilaq, tassalu tamannaavoq kamaatigisara, Helle Olsen oqarpoq.
- Maniitsumi juumooqartuartillugu, peqqissaasunik pikkorissunit peqartuartillugu nakorsallu uagutsitulli ilinniagaqarsimasut sulisorineqartillugit, taava Maniitsumi erniniartut atugarissaarnerusinnaanngillat, Helle Olsen oqarpoq.
- Aap, ajornartorsiut annertuupilussuuvoq. Isumaqarpungali periarfissaqartillugu nammineq illoqarfigisami ernisoqarsinnaasariqartoq. Taamaattoqartilluguli juumuup ernisussiornissaa pisariaqarpoq, tassami pisussaaffiit naammassineqarnissaat pisariaqarmat, Helle Olsen oqarpoq.
- Sumiiffinni napparsimmaveqarfiit eqiterneqarnerinut naammagittaalliuteqartilluta Peqqissutsimut Qullersaqarfimmut allagaqartaraluarpugut, akineqarnerli ajorluta. Taamaammat isumaqarpunga tamanna tusagassiutinut anngunneqartariaqartoq, tassalu maanna taamaaliorpunga, Helle Olsen Sisimiut peqqissaaveqarfiani ukiuni arfineq marlunni nakorsatut sulisimasoq oqarpoq.
