Erngartut nammineq pilersuusinnaapput

Engartullu BP-p qillerivimmik militsiniarneranut attuumassuteqartuusinnaanatik, Amerikamiut naalakkersuisuisa tamaani isumaginnittuutitaannut pisortaq sakkutuut naalagaat Thad Allen taama oqarpoq.

Taamaattumik BP-p qillerivimmik maqisumik militsiniarnerminik misiliinini ingerlatiinnassagaa, Amerikami oqartussat akuersaarpaat.

Tamatumunnga peqatigitillugu Barack Obamap aamma Tuluit ministeriunerata David Cameronip, Washingtonimut pisortatigoortumik siullerpaamik tikeraarnerani, uuliasioqatigiiffik oqaluuserisassani pingaarnernut ilaavoq.

Oqaluuserineqartussaq maluginiarluarneqartussaavoq, tassami Tuluit soraarnerussutisiaqarnermik aaqqissuussinerisa ilarpassui aktianik BP-meersunik aningaasalersorneqarmata.

- BP suliffeqarfiuvoq pingaarutilik, Tuluit Nunaannuinnaanngitsoq, aammali USA-mut. Taamaattumik BP-p akiliisinnaassuseqartuarnissaa pingaaruteqarpoq, Cameron atuagassiamut Time-mut taama oqarpoq.

BP-p Mexicop Kangerliumanersuani uuliamik maqisoornermut ajoqusigarpassuarminut aningaasartuutit tamaasa akilissagai, Obamap piumasaqaatigereerpaa.