Ernesto USA-mut annguppoq

Kiattup anorersua, Ernesto, nalunaaquttap akunneranut 113 kilometerit missaanik sukkassuseqarluni, USA-mi nalunaaqutaq malillugu ippassaq unnukkut kingusissukkut, USA-p nunataanut annguppoq. Anorersuaq anorersuarujussuartut sakkortutigaluni, sialummillu malitseqarluni, atuuppoq. Naalagaaffiit marluk ajunaarnersuaqarnermut maleruagassiuunneqarput.

Naalagaaffimmi North Carolinap kangisissuani ippassaq ulloq naavillugu siallerujussuareersorlu, kiattup anorersua, Ernesto, takkuppoq. Wilmingtonip pigisaani ippassaq 20 centimeteri sinnerlugu siallersimavoq, naalagaaffimmi silasiorfik naapertorlugu aatsaat taama annertutigisumik siallersimalluni.

Naalagaaffimmi tassani, panernersuarmit eqqugaasimagaluartumi, aamma ingasaallugu siallernissaa ernummatigineqaleraluarpoq.

Naalagaaffinni North Carolinami Virginiamilu guvernørerit tamaani innuttaasut ajunaarnersuaqarnermut maleruagassiuunneqarnissaat isumagaat. Taamaammat innuttaasut qimarnguivigisinnaasaat 26-t ammarneqarput. Inuit 200-nit amerlanerit taakkununnga qimaasimapput.

Kiattup anorersuata, Ernesto-p, taama sakkortutigaluni USA-mut aqqusaalutorinninnissaa ilimaginagu tamaani silasiorfiit ippassaani nalileraluarpaat.