Ernesto sakkukillivoq
Ulussaarsuaq Ernesto, USA-mi nunap immikkoortortaani Floridamiittoq, maanna sakkukilliimisimavoq, kiattup anorersuarujussuatut sakkortutigiinnalersimalluni. Anorersuarujussuartulli sakkortutigeqqilersinnaanera ernummatigineqarpoq.
Takornariat qeqertani Floridap kujasissuaniit, soorlu Key West-imiit qeqertanillu allaniit, suli qimagussimanngitsut qimaguteqqullugit peqquneqareerput.
Anorersuarujussuup Ernesto-p, Mexicop kangerliumarnga maanna qanilliartorpaa, USA-p kujasissuani, soorlu New Orleansimi nunallu immikkoortortaani allani, inuppassuit anorersuarujussuarmit allamit nalaanneqarlutik ukiup ataatsip matuma siorna toqorarput, sorpassuillu sequmillutik.
Anorersuarujussuarmik aarlerisaarut Cubap ippassaq tusarliuppaa, ilimagineqarporlu Ernesto USA-p kujataatungaanut ingerlaarnermini, Mexicop kangerliumarnganut anngutissasoq.
- Ernesto Caribiap Imartaata avannamut kangisissortaa atuarlugu Mexicop kangerliumarnatigoornermini anorersuarujussuannguussinnaavoq ulorianarluinnartoq, Floridami silasiorfimmi silasiortoq, Jack Beven, oqarpoq.
