Erneeraq qangattariaannanngorpoq

Arctic Sport-imi timersortartoq Erneeraq Lindenhann Whitehorse-mi timmisartuusaassaaq rekordilu immikkuullarissoq timmisartumik angerlaleruni nassarsinnaallugu.

Sungiusariaatsit naliginnaasuunngitsut atorneqartarput Qeqertarmiu Erneeraq Lindenhann Arctic Winter Games-imut sungiusaleraangat.

Immikkut pikkoriffigaa unammeriaaseq Airplane - tassa timmisartuusaarneq. Taaguutaatalu ilimanarsisereerpaa timi atorlugu timmisartuusaartoqartartoq. Talit nissullu siaarluarlugit unammeqataasut assamikkut singernermikkullu kivinneqartarput. Takinerpaamut akiartittoq ajutaasarpoq peqataasullu ataasiaannarlutik misiliisinnaatitaasarput.

Tassani unammeriaatsimi Erneeraq Lindenhann 2002-mi, 2004-mi, 2006-mi, 2008-mi 2010-milu ajugaasarpoq. Arctic Sportsimi unamminermi unammeriaatsimi ataatsimi tulleriiginnarnik sisamariarluni ajugaasoqarnikuunngilaq. Taannalu rekordi suli pitsanngoriarsinnaavoq Whitehorse-mi Erneeraq Lindenhann unammeqataaqqilerpat.

- Ukiut marluk matuma siornanut sanilliullugu sungiusarluarneruvunga. Pitsaasumik sungiusarpunga aammalu Whitehorse-imut aallarnissap qanilliartornerani ullut tamaasa sungiusartarlunga, Erneeraq Lindenhann oqarpoq.

Nunaqarfimmi Qeqertami qaleralinnik aalisartutut inuussutissarsiornera aamma timimigut sungiusarluartarneranut sunniuteqartarpoq.

- Qassutikka assaannannik amuartarpakka tamannalu nukittorsaatigilluartarlugu. Aamma Qeqertami katersortarfimmi sungiusarluarsimavunga aallarnissap qanillinerani Ilulissanukarnissama tungaanut, Erneeraq Lindenhann oqarpoq.

Unammersuarnerit ataasinngorneq marsip tallimaat aallartissapput Airplane-milu sisamanngorneq marsip arfineq pingajuat unammisoqassaaq.

Arctic Sports-imi nunarput sinnerlugu unammisussat tassaapput:
Angutit inuusuttuaqqat:
Jokum Lange
Niels Peter Tobiassen
Suulut Josvassen
Jens Lars Møller Jensen

Arnat inuusuttuaqqat:
Wella Vetterlain
Natuk Kristiansen

Angutit inersimasut:
Erneeraq Lindenhann
Bent Jakobsen
Tonny Fisker
Aqqaluk Petersen

Arnat inersimasut:
Bodil Mikaelsen
Bibi Mikaelsen

Sungiusaasut:
Kim Rosing
Marie K. Simonsen

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat