Erlinnartunik tillitanik nassaalernerartut
Erlinnartunik nassaarniartartut Heinz Peter Haustein Christian Hanischilu Tysklandip kujataata kangisinnerusortaani Deutschneudorfimi assaanertik ullumi nanginniarpaat.
Hans Peter Haustein tyskit inatsisartuini ilaasortaavoq Christian Hanischilu ataatagigaluaminiit kuultit nazistit tillinnikuusaat pillugit paasissutissanik nalunngisaqarpoq. Sorsunnersuup naalernerani angutaata tyskit sakkutuuinut timmisartortartunut, Lufwaffemut sumiissusersiortuusimavoq. Taassumalu oqaluttuai naapertorlugit sumi ujarlissanerlutik eqqoriarsinnaasimavaat.
Hanischip tallimanngormat tusagassiortunik katersortitsinerminni oqaatigaa ujarlerlutik uuttuutinik atukkaminnik takusinnaallugu nunap iluani, 10 meterisut ititigisumi qaarusoqartoq tassanilu savimineqartoq, allaanavianngitsullu kuultit sølvillu.
Erlinnartunik nassaarniartartut qularinngilaat kuulti nazistit toqqorsimasaat nassaarisimallugu taamaattorli pisoorsuanngornissartik ilimagissanngilaat, inatsisimmi naapertorlugit erlinnartut tyskit naalagaaffiata pigai.