Roxettekkut erinarsortuat toquvoq

Svenskeq erinarsortartoq, Marie Frederiksson Roxettemit ilisimaneqartoq 61-inik ukioqarluni toquvoq.

Tamanna manageriata, Marie Dimbergip tusagassiuutinut nalunaaruteqarluni uppernarsaraa, svenskit aviisiat, Expressen allaaserisaqarpoq.

- Nipilersortartuni tusaamasaanerpaat nuannarinerpaasattalu ilaata peerunnerata nalunaarutiginera alianartorujussuuvoq.

- Marie Fredriksson napparsimareerluni decembarip ulluisa qulingiluaanni ullaakkut toqukkut qimaguppoq, nalunaarummi allassimavoq.

Roxettemi nipilersoqataasartup, Per Gesslep suleqatini qujassuteqarfigaa.

- Ilinnut ilaquttannullu asanninnermik nassippassi. Inuuneq illeqartinnagu allaassaqaaq, Per Gessle oqarpoq.

Marie Fredriksson qaratsamigut tinunermik 2002-mi nassaarfigineqarpoq, nakorsallu oqarnerat naapertorlugu uumaannarnissaanut periarfissaq 20 – 25 procentillu akornanniippoq.

Tamannalu sivisuumik napparsimanerata aallaqqaatigaa. Marie Frederiksson kingornatigut peqqissutut nalilerneqarpoq, taamaakkaluartorli qinnguartartilluni katsorsarneqarnereerluni inuttut peqqinneranut suli unammillernartoqartarsimavoq.

Nipilersoqatigiit Roxette 1986-imi aallartipput, taakkulu nunarsuarmi tamarmi Sverigemit tusaamaneqarnerpaalerput, atugaasa ilaat tassaapput: ”It Must Have Been Love", "Listen to Your Heart" aamma "Spending My Time".

Frederikssonip napparsimanera pissutigalugu Roxette tusarsaajunnaarpoq, 2009-mili ataatsimuuleqqipput, ilaannikkooriarlutillu angalallutik nipilersoriartortarsimallutik.

Roxette Smukfestimi 2010-mi, Forum i Horsensimi 2011-mi Jelling Festivalimilu 2015-imi ilaatigut tusarnaartitsipput.