Erinarsoqatigiit Tasiilameersut Danmarkimi tusarnaartitseqattaartut
Erinarsoqatigiit Inngeratsiler Tasiilameersut Danmarkimi tusarnaartitsisaqattaarnitik ullumi aallartissavaat. Tamanna Ålborgimi pissaaq, erinarsoqatigiit Tasiilameersut Kedelhallen Nordkraft tusarnaartitsissallutik. Tusarnaartitsineq nal. 15.00 aallartissaaq.
Allattoq Peter Troelsen, Simon Uldum
juulip 29-at 2013 08:35
Erinarsoqatigiit Inngeratsiler marlunngornermi Århusimi Kalaallit Illuutaanni tusarnaartitsissapput. Tusarnaartitsineq nal. 17.30 aallartissaaq. Carstensenillu aliikkusiartarfitoqaani Tivolimi ulluni tullerni marlunni aamma tusarnaartitsissapput. Tamanna Grønland i Tivolimut atatillugu juulip 31-iani aggustillu aallaqqaataani pissaaq.
Danmarkimi tusarnaartitsinerit aggustip aappaani naggaserneqassapput, Ingeratsiler Gentofte Hovedbibliotekimi tusarnaartitsissallutik. Gentofte Tasiilarlu ukiorpassuarni qanittumik attaveqarsimapput, ilaatigut atuartunik paarlaasseqatigiinnerit pisarsimallutik, maannalu qallunaat Københavnip pigisaaniittut erinarsoqatigiit Ingeratsiler tusarnaarnissaannut periarfissaqalerput.
