Erinarsoqatigiit Aavaat Baltimore-imiit tikittunut erinarsussapput
Kalaallit Nunaata USA-llu Avannaata akornanni timmisartoq toqqaannartoq maanna aallareerpoq. Ullaap-tungaa nalunaaqutaq qulip-qeqqa minutsinik pingasunik qaangeraa Air Greenlandip timmisartuutaa, Kunuunnguaq, Baltimore-imut aallarpoq, uterumaarlunilu, sapaatip akunneranut ataasiarluni aallaqqaammut angalasassaaq, siunissarlu Air Greenlandimit isumalluarfigineqarpoq.
Suleqatitatta Jaaku Lyberth-ip Air Greenland-ip siulersuisuini siulittaasoq Julie Pars Washington-imi ippassaq oqaloqatigaa, siullermillu aperalugu nunatsinnut amerikamullu timmisartuussalernissaq isumalluarfigineqarnersoq.
- Ilaana, kisitsisit tunngavigalugit isumalluartorujussuuvugut, angalanissammi amerlangaatsiartut tunereerpavut, 2008 eqqarsaatigalugu aamma isumalluarpugut, Julie Pars oqarpoq, nangillunilu:
-Amerikamiut Kalaallit Nunaannut immaqa takornarniarusussapput, taamaammat Air Greenland nunatsinni Avannaanut, Qeqqanut Kujataanullu neqerooruteqarpoq, amerikamiullu soqutiginnittorujussuupput. Tusagassiutitigut paaasititsiniaasarpugut, USA-milu angalatitsisartut saniatigut aamma oqaloqatigisarpavut, taamalu suleqatigiinnerput qaammatini tulliuttuni aamma ingerlatissavarput, aappaagumut pilersaarusiornissaq aallartisarniassagatsigu.
Kalaallit Nunaanniit USA-liarnissaq Julie Parsip paasisani malillugit aamma soqutigineqarnerarpaa, aallaqqaammut immaqa ilaasut amerlavallaassanngikkaluarput, neriuutigaali USA-mi soqarnera, suna takuneqarsinnaanersoq, sumunnartoqarsinnaanera angalanerlu qanoq akeqarnersoq kalaallinit paaserusunneqalissasoq, Julie Pars oqarpoq, neqeroorutillugooq ukiup ingerlanerani takkukkumaarput.
Timmisartoq Kunuunnguaq Baltimore-mut nalunaaquttap akunnera ataaseq qaangiuppat nunnissaaq, Kangerlussuarmullu kingusinnerusukkut utissalluni, unnugu qulingiluat missaanni tikissalluni.
USA-miit ilaarngaartut nuannersumik tikilluaqquneqassapput. Erinarsoqatigiit Aavaat mittarfiup eqqannguani erinarsussapput, tamatuma kingorna mittarfeqarfimmi tikilluaqquneqassallutik.
