Erinarsoqatigiissuit nersornaasigaanngitsoorput

Nunat Avannarliit Nipilersornermut nersornaasiuttagaanik nersornaasigaanissamut nunatsinnit siunnersuutigineqartut Erinarsoqatigiissuit toqqagaanngitsoorput, ukioq manna nersornaat 350.000 koruuninik aningaasartaqartoq tamatumuuna svenskit erinarsoqatigiivisa Eric Ericssons korikkunnut tunniunneqarmat.

Svenskit erinarsoqatigiivi taakku pissarsisut nunani avannarlerni nuannarineqarnerpaanut ilaasut nipilersoqatigiissuarnik nunarsuarmi tusaamasaasunik suleqateqartartutut ilisimaneqarluarput.

Nunat avannarliit nipilersornikkut nersornaasiuttagaat ukioq manna erinarsoqatigiiginnarnut perngaammik tunngatinneqarpoq.

Nunani avannarlermiut tamarmik erinarsoqatigiinnik marlunnik siunnersuuteqartut Nunarput Savalimmiullu tamarmik immikkut erinarsoqatigiinnik ataatsinik siunnersuuteqarput.

Nunatsinni Erinarsoqatigiissuit aqutsisuata Per Rosingip svanskit toqqagaanerat ajorinngilluinnarpaa.

- Soorunami kalaallit toqqagaasimasuuppata nuannissagaluaqaaq, kisianni Eric Ericssonip erinarsoqatigiivi asseqanngiusartuugamik tamanillu nuannaartorineqarlutik, Per Rosing oqarpoq.

Nunat avannarliit nipilersornikkut nersornaasiuttagaat nunat avannarliit siunnersuisoqatigiivi Oslomi oktoberimi ataatsimiilerpata tunniunneqassaaq.