Erinarsoqatigiissuit nersornaaserneqarnissamut piukkussaapput
Nunat avannarliit nipilersornikkut nersornaasiuttagaanut Nunatsinni Erinarsoqatigiissuit ukioq manna piukkunneqarlutik nersornaaserneqartussatut siunnersuutigineqarput.
Nersornaaserneqarnissamut piukkunneqartut nunanit avannarlerneersut katillutik aqqaneq marluupput. Nunatsinnit innersuussutigineqartut Erinarsoqatigiissuit 1991-imili tusarnaartitsisalerput taamanerniillu CD-nik pingasunik saqqummersitsisimallutik. Erinniortoq erinarsoqatigiinnillu aqutsisoq Per Rosing, Erinarsoqatigiissuaqalermalli peqataasoq oqarpoq, nunani avannarlerni erinarsoqatigiit erinarsoriaasiallu assigiinngissuteqartorujussuusut:
- Nunatsinni erinarsoqatigiit ileqqorigamikku ilinniarsimasuunatik namminneq piumassutsiminnik erinarsortartuullutik, amerlarnerpaartaallu immaqa 99 procentit nuutersorneq ajorlutik. Tassa Skandinaviami erinarsoqatigiinut allanut naleqqiullutik allaassutaat. Nunani avannarlerni allani erinarsornermut ilinniartarput. Nipimik pinngortinnissaa ilinniarlugu, meeraanerminniit nuutersorneq aamma ilinniartarpaat aqutsisuilu ilinniarsimasuusarlutik. Tamanna tunngavigalugu nipimik atuinerat uagutsiniit allaanerusarpoq. Nuutit malillugit erinarsortarnerat eqqornerusaraluarluni kisianni kalaallit allaassutigaat, qamannga pisumik erinarsortaramik, tusaaneqarsinnaasarpoq erinarsuut nuannaralugu isumaqartillugulu, uummammit pisumit erinarsortartut. Tamannalu nersornaasiinermi naliliisussat pingaartikkumaaraat neriuppunga.
Nunat avannarliit nipilersornikkut nersornaasiuttagaannut nunatta saniatigut nersornaaserneqarnissamut piukkunneqartut nunanit ukunanngaannnerput: Savalimmiut, Danmark, Island, Norge, Finland, Sverige Ålandilu.
