Erik Jensenip Lund Olsenip suliarisimasai suliarissavai
Naalakkersuisut siulittaasuat Kim Kielsen sisamanngornermi ualikkut nalunaaqutaq marlunut tusagassiortunik katersortitsivoq. Kim Kielsenip Erik Jensen naalakkersuisortaatut ilisaritissagaa naatsorsuutigineqareerpoq.
Martha Lund Olsen Sermersuup Kommuniani kommunimut qinersinissamut sassarniarluni aalajangerneratigut Naalakkersuisunit soraarsitaanerata kingorna Mute B. Egedep (IA) kommuninut, nunaqarfinnut, isorliunerusunut attaveqaqatigiinnermut nunaqarfimmullu naalakkersuisuuffik tigugallarpaa.
Taannalu naalakkersuisuuffik maanna Siumumi ilaasortamit naalakkersuisuuffigineqaqqilerpoq tassalu Erik Jensen naalakkersuisunngorluni. Naalakkersuisunili ivertinneqarnera Inatsisartunit ataasinngorpat akuerineqaqqaassaaq.
Erik Jensenip naatsumik ilisaritinnera:
Erik Jensen Qeqqata Kommuniani kommunalbestyrelsimi manna tikillugu Siumup gruppiani siulittaasuulluni ilaasortaavoq. 2015-imi folketingimut qinigassanngortikkami Siumumit sassartuni qinerneqarnerpaat pangajoraat, Aleqa Hommond Jens Erik Kirkegaardilu qinerneqarnerullutik.
Erik Jensen Inatsisartuni Naalakkersuisuniluunniit ilaasortaanikuunngilaq. Taamaammat Kim Kielsenip Naalakkersuisuni ilaasortassatut toqqagaa nutaajuvoq.
Erik Jensen, 41-nik ikiulik, ukiorpassuarni INI A/S-imi nakkutilliisutut atorfeqarpoq, kingornalu suliffeqarfimmi tassani attaveqaqatigiinnermik suliaqartuulluni. Nuliaqarpoq pingasunillu paneqarluni.
