Erik Jensen: Sioorasaarisoqarsimassappat tamanna akuersaanngilluinnarparput

Eqqartuussisup Aslak Jensen pinerloqqippat ulluni 20-ni pineqaatissinneqarsimasunut inississarfimmiittussanngortillugu ippassaq eqqartuuppaa.

Taanna inunnik isumaginninnermik sullissisumut toqutsinissamik sioorasaarisimasutut pisuutinneqarpoq. 

Pisullu Siumumi ulluni tulliuttuni ataatsimiissutigineqartarnissaa, Siumup siulittaasua Erik Jensen paasissutissiivoq.

- Piffissami aggersumi ullunilu tullerni una pillugu inuttaa oqaloqatigereersimariarukku, aammalu siulersuisut oqaloqatigereersimariarukkit qanoq alloriaqqittoqarnissaa piumaarnersoq nalunarumaanngilaq, Erik Jensen oqarpoq.

AAMMA ATUARUK Siumumi politikerip eqqartuussaanera: Pinerluuteqaqqissaguni ulluni 20-ni pineqaatissinneqarsimasunut inissiisarfimmiissasoq

Aslak Jensen Inatsisartunut qinersinermi 814-init taaguunneqarluni Siumumit taaguunneqarnerpaamut pingajuuvoq.

Siumullu ilaasortaminik tunngaviusumik tapersersuisartoq, Erik Jensen oqarpoq.

- Siumuminngaanniit pingaartipparput, sassartitarinikuusagut angusaat pillugit tapersersorpagut.

Erik Jensenip aamma erseqqissaatigaa, partii sinnerlugu qinigassanngortinniartut pineqaatissinneqarsimannginnermut allagartamik tunniussisut.

Sioorasaarutit akuersaanngilluinnaratsigu 

Partiilli suut tamaasa tapersersorsinnaanngikkai, ilanngullugu oqaatigaa.

- Siumuminngaanniit erseqqissaatigissavarput, sioorasaarisoqarsimassappat, tamanna akuersaanngilluinnaratsigu. Aamma sulisut illersugaanissaat pingaartikkatsigu, Erik Jensen oqarpoq.

Aslak Jensen pinngitsuunerarpoq.

Aamma eqqartuussut suliareqqitassanngortinniarneraa suli nalunarpoq. 

Taakkulu Siumup nalilersuinerani ilaatinneqartariaqartut, Erik Jensen isumaqarpoq.

Aslak Jensenili sioorasaarisimasutut suliap inaarutaasumik naammassineqavinnerani pisuutinneqarpat, aamma tamanna nalilersuinermut ilaassaaq.

- Soorunami inuttaa oqaloqatigissavarput. Qanoq alloriaqqittoqarnissaa oqaloqatigiissutigissavarput, tamatsinnut pitsaaneq, aammalu partiimut pitsaaneq alloriarfigisariaqaratsigu, Erik Jensen oqarpoq.